29.01.2019
Муассисаи давлатии рӯзномаи “Ҷавонони Тоҷикистон” бахшида ба эълон гардидани солҳои 2019-2021 ҳамчун “Солҳои рушди деҳот, сайёҳӣ ва ҳунарҳои мардумӣ” таҳти унвони “Тоҷикистон баҳри ман аз деҳи ман сар мешавад” ОЗМУН эълон мекунад.
Дар озмун журналистони касбӣ, адибону публитсистон ва ҳамаи онҳое, ки ба кори қаламкашӣ ва эҷод алоқаманданд, сарфи назар аз синну солашон метавонанд иштирок намоянд. Шарти озмун он аст, ки муаллифон бояд дар матолиби худ ҷавононеро муаррифӣ намоянд, ки бо илҳом аз сиёсати созанда ва бунёдкоронаи Асосгузори сулҳу ваҳдати миллӣ-Пешвои миллат муҳтарам Эмомалӣ Раҳмон дар рушду ободии деҳаи худ ва муаррифии Ватан саҳм гузошта, намунаи ибрати ҷавонони дигар мебошанд.
- муаррифии амалҳои созандаву ободкоронаи ҷавонон;
- саҳми ҷавонон дар рушди ҳунарҳои авлодӣ;
- амалҳои хайрхоҳона ва бунёдкоронаи ҷавонон;
- инъикоси дастовардҳои варзишгарони маҳал;
- шиносонидани ҷавонони ихтироъкори деҳот;
- ҳаёти ҷавонони соҳибкори деҳот;
- маорифчиёни деҳот аз ҳисоби ҷавонон;
-саҳми чакандӯзони маҳаллӣ дар рушди ин навъи ҳунар;
- муаррифии ҷавонони ҳунарманд (кандакор, гаҷкор, оҳангар...);
- ҷавонон-кишоварзони деҳот.
Маводҳои иштирокчиёни озмун ҳам аз тариқи рӯзномаи “Ҷавонони Тоҷикстон” ҳам тавассути сомонаи интернетии он – www.javonon.tj ба чоп расонида мешаванд. Дар ҳамин ҳол ҳар маводи озмуние, ки дар сомонаи нашрия ба чоп расида, аз тарафи хонандагон бештар мутолиа мегардад, дар натиҷагирӣ аз ҷониби ҳакамон ба назар гирифта мешавад.
Иштирокчиёни озмун маводҳои худро дар қолаби жанрҳои публитсистӣ дар ҳаҷми то 4 саҳифа бо ҳуруфи Times New Roman Tj, андозаи 14 ба почтаи рӯзнома javonontj@mail.ru ё бевоисита ба унвонии идораи нашрия - хиёбони Саъдии Шерозӣ-16, ошёнаи 1 ирсол намоянд.Матлабҳо ба озмун бо ишораи Барои озмуни “Тоҷикистон баҳри ман аз деҳи ман сар мешавад” қабул карда мешаванд.
Озмун то 1 май идома ёфта, ғолибон дар “Рӯзи ҷавонони Тоҷикистон” дар фазои тантанавӣ қадрдонӣ карда мешаванд.